Vetrardagskrá

Garðyrkjufélags Íslands veturinn 2009 - 2010

Fyrirlestrar á vetrardagskrá félagsins eru haldnir þriðja fimmtudag í hverjum mánuði tímabilið september til maí.

Fyrirlestrarnir eru haldnir í sal Orkuveitu Reykjavíkur, Bæjarhálsi 1, 110 Reykjavík og hefjast allir klukkan 20:00 og standa til ca. 22:00. 

Aðgangseyrir er sem áður 500.- kr. fyrir félaga og maka, en 800. kr.- fyrir gesti, sem að sjálfsögðu eru velkomnir á alla fyrirlestrana. 

17. september 2009 – Villisveppir og nýting þeirra
Dr. Bjarni Diðrik Sigurðsson, prófessor LBHÍ – mun fjalla um villisveppi, hvernig þeim er safnað og hvernig þá má nýta. Enn er tími sveppanna ekki liðinn þetta sumarið, við því má búast að rekast á sveppi í skógum og móum af og til fram til hörðustu haustfrosta. Dr. Bjarni er mikill áhugamaður um nýtingu villisveppa og býr yfir hafsjó af fróðleik um þetta efni. Því er um að gera að láta þetta tækifæri ekki framhjá sér fara. Íslenskir villisveppir eru vannýtt auðlind en ekki eru allir þeirra jafn vingjarnlegir eða hentugir til átu. Þess vegna er gott að setja sig vel inn í réttar greiningar og læra réttu handtökin við sveppanýtinguna.

15. október 2009 – Eru haustlaukar „loforð um litríkt vor“?
Hafsteinn Hafliðason garðyrkjumaður fer yfir helstu atriðin varðandi lagningu og ræktun á hinum vorblómstrandi haustlaukum. Tegundir, aðferðir og möguleikar. Garðyrkjufræðingarnir Steinunn Reynisdóttir frá Garðheimum og Lára Jónsdóttir frá Blómavali svara svo fyrirspurnum og spjalla um framtíðarmöguleika á útvegun nýrra yrkja og tegunda af haustlaukum fyrir safnara við fólkið í salnum, ásamt Hafsteini, eftir kaffihlé.

19. nóvember 2009 – Garðrækt í Nesi við Seltjörn á síðari hluta 18. aldar  - um kornræktartilraunir, matjurtarækt og lækningajurtagarð Björns Jónssonar lyfsala. 
Jóhanna Guðmundsdóttir, nemi í sagnfræði segir frá Birni Jónssyni lyfsala í Nesi við Seltjörn sem ræktaði ekki einungis lækningajurtir heldur gerði hann einnig merkilegar tilraunir með kornrækt og var mikill frumkvöðull í matjurtarækt hér á landi.  Tilefnið er lækningajurtagarður sem fyrirhugað er að setja upp við Lyfjafræðisafnið við Neströð á Seltjarnarnesi (Nesstofu) næsta sumar sem samstarfsverkefni Garðyrkjufélagsins, Læknafélags Íslands og Lyfjafræðingafélags Íslands í tilefni af 125 ára afmæli GÍ og 250 ára afmæli Landlæknisembættisins.

17. desember 2009 – Hleðslur, steinverk og japanski garðurinn
Þorkell Gunnarsson skrúðgarðyrkjumeistari. – Það skal vel vanda sem lengi á að standa, segir máltækið. Margir hafa gaman af því að spreyta sig á grjótvinnu í garðinum sínum, gera t.d. veggi og stíga úr náttúrugrjóti eða vinna með grjót á annan hátt. Hvernig á að meðhöndla íslenskar bergtegundir? Hvaða tæki og tól þarf til? Einnig hafa garðar í japönskum stíl heillað marga. Hér verður stiklað á stóru um undirbúninginn, útfærsluna og hugsunarháttinn að baki japönsku garðanna.

21. janúar  2010 – Hvað er starfsfólk að gera allt árið í Grasagarðinum?
Eva G. Þorvaldsdóttir og Auður Óskarsdóttir
A) Eva G. Þorvaldsdóttir, forstöðumaður, mun reyna að svara þessari spurningu í máli og myndum. Þar sem þetta er frekar þurrt efni, fullt af staðreyndum með stólpa- og kökuritum, verður lífgað upp á fyrirlesturinn með plöntumyndun. Ein plöntumynd verður á hverri glæru sem gestir geta spreytt sig á að greina en í lokin verður farið yfir tegundirnar.
B) Eitt af verkefnum Grasagarðsins er fræðsla fyrir nemendur og mun Auður Óskarsdóttir, garðyrkjufræðingur, segja frá fræðslustörfum sínum m.a. verkefnunum ,,Náttúrulist“ og ,,Haustævintýri“.

18. febrúar 2010  - Ávaxtatré 
Þrátt fyrir tiltölulega ungan aldur er garðyrkjumeistarinn Jón Guðmundsson á Akranesi orðinn þjóðsagnapersóna í íslenska garðyrkjuheiminum! Hann er gaurinn sem fær allt til að vaxa og dafna í garði sínum á skjóllitlum fjörukambi við Faxaflóann. Ekkert lætur hann óreynt hvort sem það eru nú salatblöð eða eplatré! Hér mun sannur brautryðjandi ausa úr sjóðum reynslu sinnar og úthluta digrum fróðleiksmolum í þekkingarbúr áheyrenda sinna! Áhugavert, skemmtilegt og fræðandi! – Fræðslukvöld sem enginn má missa af.

18. mars 2010 – Matjurtagarðurinn, möguleikar, gömul gildi og ný viðhorf
Hollur er heimafenginn baggi, var haft að orði hér áður fyrr. Og víst er um það að þegar við byrjum að rækta matjurtir, þá opnast okkur nýjar víddir í lífsgæðunum. Að geta uppskorið grænmeti úr eigin garði er síendurtekinn gleðiviðburður. En erum við bundin við hinn hefðbundna, gamla kálgarð – eða eru aðrir möguleikar í spilunum? Við þessu og ótal mörgu öðru viðkomandi matjurtarækt fást svör á fyrirlestrinum. Nánar tilkynnt um fyrirlesara þegar nær dregur.

15. apríl  2010 – Aðalfundur Garðyrkjufélags Íslands.

20. maí 2010  – Blómaker sumarsins, svalir, pallar, tröppur og stéttar
Þóra Sumarlín og Jarþrúður Jónsdóttir. - Alls staðar lífga blómin upp á og það er ekkert athugavert við það að setja eina og eina matjurt eða krydd með blómskrúðinu. Þær Þóra Sumarlín blómaskreytir og Jarþrúður Jónsdóttir garðyrkjufræðingur sem báðar eru félagar í GÍ og vinna í Blómavali á Selfossi leiða okkur í allan sannleika um strauma og stefnur í vali á kerjum og gróðri sem hentar í þau. Góð ráð og nauðsynlegur fróðleikur fyrir þá sem hafa ekki annað en svalir til að rækta á, en líka alla þá sem vilja lífga svolítið upp á „hörðu slitfletina“ í garðinum sínum.